Adhurey Armaan

Major Ranveer Singh seema par yuddh ladd rahe thay aur unki chhoti behan Rajni ki Shaadi ka din aa gaya tha. Unhone apni behan se uski shaadi mey aane ka vaayda kiya tha aur Rajni bhi apni aankhon mey sapne sajaye apne bade bhai jinhe wo pyaar se "Veer ji" bulati thi ka intezaar kar rahi thi aur khushi mey yun hi badbada rahi thi.

Ghar aangan khushi se chehak jaayega,
Shagun khud apni bheeni si mehak utthayega,
Mehendi kuch aisa rang laayegi,
Mere haatho ki rangat hi badal jaayegi.

Veer ji jung mey jald hi jeet ka parcham lehrayenge,
Phir wo apne haatho se meri doli sajayenge.

Khushi ka mahual hoga,
Baja aur Dhol hoga,
Varfer bhi dil khol hoga,
Geeto ka bol hoga,
Dilo ka mol hoga,
Sama wo anmol hoga.

Idhar kitne armaan sajaye Rajni ban rahi thi dulhan,
Kahin door ghat chuka tha apshagun.
Goan mey sabhi thay Major Ranveer ki bahaduri aur jazbe kay mureed,
Jung to unhone jeet li par apne desh kay liye ho gaye wo shaheed.

Rajni ko ye baat samjhane mey har koi gaya haar,
Wo nahi thi iss kadve sach ko maan ne ko tayyar.
Uske zehan mey tha yaadon ka mausam gulzaar,
Wo besudh si phir se gaane lagi apna malhaar.

Bindiya meri lagi chamakne,
Payal meri lagi chhanakne,
Gajra mera laga mehekne,
Chudi meri lagi khanakne,
Saj gaye mere saare gehne.

Khil gaya mera roop shringaar,
Apna ghar lag raha hai paraya pehli baar,
Raunak har taraf chhayi apaar,
Par Veer ji kay bina lage suna saara sansar.
Dekho mera dil naa dukhao,
O, mere bhaiya jaldi aao.

Maa nay samjhaya.
"Pagli, tere bhaiya ab kabhi nahi aayenge."

Rajni tunak kar boli.
Apni behan ko wo aise thode hi rulayenge,
Vaayda kiya hai unhone wo zaroor aayenge.
Meri doli bhi wahi sajayenge.

Shaadi kay ghar mey maatam chhaa gaya,
Jab waha shaheed ka janaza aa gaya.

Rajni -> Tum...sab...sab...chup kyu ho ?
Arre, koi unka swagat to karo.
Maa...maa....tu to kehti thi ki mere bhaiya kabhi nahi aayenge,
Wo to....wo....apne saathiyo ko bhi apne saath mey hai laaye.
Unhone apna vaayda...vaayda poora kiya,
Dekho sab....dekh naa maa....wo dekh,
Mere Veer ji jhande mey lipatkar hai aaye.